Bergsikring av Oddahallen

Oddahallen er eit fjellanlegg etablert i fjellet på austsida av friidrettsanlegget i Odda med overdekning opp mot bustadfeltet på Fureskorane. Oddahallen er ein sentral arena spesielt for barn og unge innan idrett, skule og fritidsaktivitetar i kommunen. Den har og ein kritisk funksjon i samanheng med beredskap som det største tilfluktsrommet i kommunen. Det er gjennomført ei ny ingeniørgeologisk kartlegging etter registrert nedfall i idrettshallen. Tidlegare rapportar frå Norconsult (2021 og 2022) har tilrådd oppfølging og kartlegging av bergmasse og sikringstiltak. Den siste tida har delar av anlegget vore stengt i påvente av ei grundig tilstandsvurdering og naudsynte sikringstiltak. Befaring og kartlegging utført av Norconsult syner at eksisterande bergsikring over betongkvelvet og ved skytebanen i Oddahallen er sterkt korrodert og har mista funksjonen sin. Det er naudsynt å gjennomføre bergsikring med nye bergband, heilstøypte boltar, steinsprangnett og utbetring av plankesperrer før hallen kan gjenopnast. Det er kritisk for Ullensvang kommune å få gjenopna hallen igjen, og konkurransen blir difor gjennomført med korte fristar. Befaring er planlagt 06.11 kl. 12.00. Oppmøte ved Oddahallen.